20241208主日講道－紀念或忘記 －劉民和 牧師
聖經/申命記8:1-20
8:1「我今仔日所命令你一切的誡命，恁著執守來行伊，互恁通活，人額加添多多，通入去得著耶和華對恁的列祖所咒誓應允的地。
8:2你也著記得耶和華──你的上帝此四十年導你佇曠野的路，是欲互你謙卑來試驗你，欲知你的心內怎樣，肯守伊的誡命抑無。
8:3伊互你謙卑，互你枵餓，用你所呣識你的列祖也呣識的嗎哪養飼你，互你知，人呣是干單倚靠餅來活，人是倚靠耶和華嘴所講一切的話來活。
8:4此四十年，你的衫褲無破，你的腳也無肨泡(phòng-phā)。
8:5你的心著知，耶和華──你的上帝教督你，親像人教督伊的子一樣。
8:6閣你著執守耶和華──你的上帝的誡命，來行伊的道路，來敬畏伊。
8:7因為耶和華──你的上帝導你入彼個媠的地，彼個地有溪，有水泉，有深淵，對山谷及山流出來。
8:8是出小麥、大麥、葡萄樹、無花果樹、石榴(sia̍h-liû)樹的地，也出橄欖樹，及蜜的地。
8:9你佇彼所在食物充足，佇遐你也無欠一項。彼所在的石頭是鐵，佇伊的山通掘銅。
8:10 你欲食到飽，就為著伊所賞賜你的媠地，來謳咾耶和華──你的上帝。
8:11「你著謹慎，免得你𣍐記得耶和華──你的上帝，無守伊的誡命、法度、律例，就是我今仔日所命令你的；
8:12 驚了你已經食飽，已經起媠的厝來徛起，
8:13 你的牛羊加添，你的金銀加添，你所有的攏加添，
8:14 彼時你的心自高，𣍐記得耶和華──你的上帝，就是導你對埃及地做奴才的家出來的，
8:15 伊導你經過彼個大閣通驚的曠野，遐有火蛇、蠍仔蟲(giat-á-thâng)、乾燥無水的地。伊曾為著你互水對𠕇(tēng)的石磐流出來，
8:16 閣佇曠野，將你的列祖所呣識的嗎哪養飼你，是欲互你謙卑，試驗你，互你到尾得著福氣；
8:17 驚了你心內想講：『得著此個大的基業是對我的氣力、我的手的能力。』
8:18 總是你著記得耶和華──你的上帝，因為你得著大基業的氣力，是伊互你，欲成伊所對你的列祖咒誓的約，親像今仔日的款。
8:19 將來你若𣍐記得耶和華──你的上帝，趁別個上帝服事伊，敬拜伊，我今仔日嚴嚴警戒恁，恁的確滅無。
8:20 耶和華佇恁的面前所滅無許個國，恁也欲按呢滅無，因為恁呣聽趁耶和華──恁上帝的話。」