الشاعر بندر عدنان المالكي
سلام الله يبو مفرح وعطنا وشهي الاخبار
سرا بي ليل مثل الفجر في نوره بأنسامه
اشوف القابله مثل امس واشوف الكبار صغار
واشوف عيون ماتنضام واشوف عيون منضامه
نويت اذبح قصيدي وسط مكة واثر حولي نار
تقرب كل ماقربت سكيني على عضامه
وصاح الشعر يابندر ترا به من يرد الثار
ماني كبش الفداء ولا انت بأبراهيم ومنامه
وقلت استغفرالله كيف انا غامرت بإستهتار
هذا طيش العقول اللي تعاف الظلم ونظامه
ياعبدالله هذا ماهو بحلم ولا خيال اشعار
هذا واقع نعيشه والمدرهم عاف درهامه
يبو مفرح هاك العلم الحقيقي واكشف الاسرار
وعلم عن ملوك الشعر في الساحه وخدامه
الرد من الشاعر عبدالله مفرح الغفيري المالكي
هلا يا مرحبا مليار يا بندر رفيع الكار
علومي خير هذا موجز عن الحال واعلامه
ترى علوم الصغار صغار وعلوم الكبار كبار
وحنا اللي نميز بين قاع الأرض والهامة
اشوفك يا ولد عدنان جاتك حالة استنفار
سنى نيرانها ضوى السراة ونجد وتهامة
نصيحة مني اليا جتك بقعا تنفث الأسحار
بذكر الله تحرقها وترميها فدوامة
قصيدك لا تميته بالغياب وكثرت الأعذار
يموت الشاعر وتبقى بيوته حبكة إلهامة
ترانا نعرف ملوك الشعر واللي ماهم شعار
مثل ما يُعرف المجهول من تبصيمة إبهامة
مليك الشعر من دون المبادي صارمٍ بتار
يذود عن الحمى ويرز فوق الشامخ اعلامة