2024 оны 12 дугаар сарын 19-ний өдөр Инженеринг менежмент клубээс барилгын салбарт ажиллаж буй мэргэжилтнүүдийн дунд зохион байгуулдаг 90 дэх удаагийн өглөөний уулзалтад Ногоон барилгын олон улсын эрх зүйн орчин сэдвээр толилуулсан илтгэлийг үүгээр хуваалцаж байна.
Танилцуулгыг бүрэн эхээр нь дараах холбоосоос үзнэ үү.
www.slideshare.net/slideshow/ss-2575/274218597
#1: Сайн байцгаана уу,
Миний нэрийг Бат-Эрдэнэ овогтой Адилбиш гэдэг. Иргэний ба үйлдвэрийн барилгын инженер мэргэжилтэй. Барилга, байгууламжийн бүтээцийн зураг төслийн зөвлөх инженер болон Төслийн удирдлагын институтийн Мэргэшсэн төслийн удирдагч зэрэгтэй.
2021 оны 11 дүгээр сарын 22-оос 23-ны өдрүүдэд Монгол Улсын Барилга, хот байгуулалтын яамнаас харьяа байгууллага болон салбарын мэргэжлийн төрийн бус байгууллагуудын архитектор, инженер, мэргэжилтнүүдийн дунд зохион байгуулсан "EDGE программыг ашиглан барилга байгууламжийг үнэлэх нь" сургалтад хамрагдаж, 2022 оны 2 дугаар сарын 19-ны өдөр EDGE Exam шалгалтаа амжилттай өгч, EDGE Expert болсон.
Өнөөдөр Инженеринг менежмент клубээс зохион байгуулж буй барилгын салбарт ажиллаж буй мэргэжилтнүүдийн өглөөний 90 дэх удаагийн уулзалтад Ногоон барилгын олон улсын эрх зүйн орчин сэдвээр та бүхэнд илтгэл тавихаар энэхүү танилцуулгыг боловсрууллаа.
#2: Олон улсын ногоон барилгын эрх зүйн орчин агуулгын хүрээнд ногоон барилга гэх энэхүү сэдвийн уг үндэс болсон Нэгдсэн Үндэсний Байгууллагын Уур амьсгалын өөрчлөлтийн суурь конвенцын Киотогийн протокол (i), Парисын хэлэлцээр (ii), Тогтвортой хөгжил - 2030 хөтөлбөр (iii) болон Их Британи, Америкийн Нэгдсэн Улс, Холбооны Бүгд Найрамдах Герман Улс, Швед зэрэг өндөр хөгжилтэй улсуудын ногоон барилгын үнэлгээний систем (iv) мөн Олон улсын санхүүгийн корпорацаас хөгжиж буй улс орнуудад зориулж гаргасан үнэлгээний систем (v) зэргийг танилцуулна.
Дэлхийн улс орнуудын иргэд нь ахуй амьдрал, үйлдвэрлэл, хэрэглээнийхээ хэв маягийг өөрчилж, байгальд илүү ээлтэй, “ногоон” хэв загварт шилжих хандлагатай болсон. Улс орнуудын хувьд тогтвортой хөгжилд хүрэх бодлогоо тодорхойлон төлөвлөх, түүний хэрэгжилтийг хангахад анхаарлаа хандуулж байна. Барилгын салбарын мэргэжилтнүүд бидний хувьд олон улсад хүлээн зөвшөөрөгдсөн ногоон барилгын үнэлгээний аргачлалуудаас суралцаж, мэдлэг чадвараа дээшлүүлэх шаардлага үүсэж байна.
#3: Тогтвортой хөгжил - 2030 хөтөлбөрийг анх 2012 онд Рио Де Жанейро хотод Нэгдсэн Үндэсний Байгууллагын Тогтвортой хөгжил бага хурлын үеэр санаачлагдсан. Санаа нь Мянганы хөгжлийн зорилтуудад суурилсан бөгөөд хэрэгжээгүй зорилт бүрийг нөхөн хэрэгжүүлэх юм. 2015 онд хэрэгжилтийн хугацаа нь дуусгавар болж буй “Мянганы хөгжлийн зорилтууд”-ын үргэлжлэл болгон Тогтвортой хөгжлийн зорилгыг 2015 онд Нэгдсэн Үндэсний Байгууллагын Ерөнхий Ансамблейн 70 дугаар чуулганаар 17 зорилго, 169 зорилтыг баталж, 2016 оны 1 дүгээр сарын 1-ээс албан ёсоор дэлхийн нийтээр хэрэгжиж эхэлсэн.
Эх сурвалж: Ногоон барилглын төлөвлөлт 2 дугаар нүүр
Тогтвортой хөгжил нь хүрээлэн буй орчны тогтвортой байдал (i), нийгмийн тогтвортой байдал (ii), эдийн засгийн тогвортой байдал (iii) гэсэн гурван хэмжүүрийг нийтлэг хангаж байхаар авч үздэг. Хүрээлэн буй орчны тогтвортой байдлыг агаар, ус, дуу шуугиан, ашигт малтмал, ой, газар, ургамлын болон амьтны төрөл зүйлс, хөрс гэх мэт байгалийн хүчин зүйлсийн одоогийн болон ирээдүйн зохицтой түвшингээр тооцож дүгнэдэг.
Эх сурвалж: Ногоон барилга номын 7 дугаар нүүр
Эх сурвалж: sdg.1212.mn/Home/Goals
#4: Аж үйлдвэрийн хувьсгал (1790-1850) эхэлсэн цагаас хойш агаар мандал дахь нүүрстөрөгчийн давхар исэлийн агууламж 35 хувиар ихэссэн нь дэлхийн дундаж температур хурдтайгаар нэмэгдэхэд хүргэсэн. Уур амьсгалын энэхүү өөрчлөлтийн гол шалтгаан нь өндөр хөгжилтэй орнуудын хүлэмжийн хийн ялгаруулалт аж. Энэ протоколын гол зорилго нь агаар мандалд их хэмжээний хүлэмжийн хий ялгаруулдаг, өндөр хөгжилтэй улс орнуудад 2012 он гэхэд 1990 онд байсан хүлэмжийн хийн ялгаралын хэмжээг дунджаар 5.2 хувиар бууруулах үүрэг хүлээлгэсэн.
Эх сурвалж: Ногоон барилгын практик номын 12 дугаар нүүр
Уур амьсгалын өөрчлөлтийн суурь конвенцийг хэрэгжүүлэх олон улсын хэмжээний эрх зүйн зохицуулалт бүхий анхны бичиг баримт болох Киотогийн протоколийн тухайд тодорхой нэр заасан хөгжингүй улсууд хүлэмжийн хийгээ 1990 оны түвшнээс таван хувиар бууруулах үүрэг хүлээсэн. Гэвч эдгээр улсуудын хувьд “эдийн засагт сөргөөр нөлөөлнө” гэх шалтгаанаар хожуу нэгдсэн, зарим нь огт нэгдээгүй тул хэрэгжилт нь удааширсан. Шинэ хугацаа тогтоосон нь 2020 онд дуусгавар болсон.
Эх сурвалж: Mongolian Economy сэтгүүл 2024 оны 7 сарын дугаар 9 дүгээр нүүрЭх сурвалж: www.investopedia.com/terms/k/kyoto.asp