Sýningin „Jólin hans Hallgríms“ hefur verið í Hallgrímskirkju síðustu níu ár og núna í tíunda sinn býður Hallgrímskirkja leikskóla- og grunnskólabörnum í Reykjavík og nágrenni, að koma í heimsókn í Hallgrímskirkju í aðdraganda jólanna. Sýningin byggir á samnefndri bók Steinunnar Jóhannesdóttur.
Í heimsókninni er skoðunarferð um kirkjuna og sagt frá kirkjumunum. Börnin fá stutta endursögn úr bókinni Jólin hans Hallgríms og hún segir frá undirbúningi jólanna hjá Hallgrími Péturssyni þegar hann var ungur drengur og hvernig jólin voru fyrir 400 árum á Íslandi. Verkefnið hefur mælst vel fyrir og fengið góð viðbrögð.
Baðstofa verður sett upp fyrir sýninguna. Þar sem hægt verður að vitja jóla fortíðar. Í baðstofunni má finna muni sem fjallað er um í bókinni og leikararnir Níels Thibaud Girerd og Pálmi Freyr Hauksson töfra upp jólastemningu sem vísa til sögunnar.
Börnum á aldrinum 3 til 10 ára er boðið að koma í skóla- eða hópheimsókn. Hópar geta bókað heimsókn þegar nær dregur sýningumeð því að senda tölvupóst til Hallgrímskirkju á netfangið vidburdir@hallgrimskirkja.is.
Aðgangur er ókeypis!
Tekið verður á móti hópum á virkum dögum í desember. Hver heimsókn tekur u.þ.b. 40 mín.
Þótt margt hafi breyst á fjórum öldum er ýmislegt kunnuglegt við undirbúning jólanna hjá heimilisfólkinu í Gröf á Höfðaströnd þar sem Hallgrímur átti heima. Þá eins og nú kviknar ljós í hjörtum mannanna þótt myrkrið grúfi yfir.
HALLGRÍMSKIRKJA - STAÐUR BARNANNA!