新疆大環線##獨庫公路##可可托河##喀納斯##禾木##海上魔鬼城##火焰山##天山天池##那拉提##賽里木湖##
各位朋友早晨，我係深山大叔，今日想同各位講新疆大環線。即係由烏魯木齊出發，圍繞北疆的景區走一圈。
北疆大環線遊玩的景點包括
可可托海、禾木景區、喀納斯、海上魔鬼城、火焰山
天山天池、獨庫公路、那拉提、賽里木湖
至於團費的比較，已經係上一條片講咗，各位可以去睇番就知道係香港報團同國內報團價錢的分別。
首先講可可托海。由烏魯木齊出發，07:00發車，前往可可托海景區入口，車程約 500 公里，需時走 8 小時，然搭乘景區車約 1 小時往景點。
景區靚唔靚？每人對靚的標準唔同，我個人覺得係靚。但是 8.5 鐘頭車，入景點逗留個零鐘。然後又話要走，因為天黑路遠，返酒店都要再走 100 公里，先到住宿點。
值得一讚的是，可可托海的景區，管理都算完善，咁旺場，廁所衛生都唔差。
依家講禾木景區。今朝8點發車，依家又係坐咗8個幾鐘頭車，到景區門口，然後要坐區間大巴士，入景區，到咗景區後，就要轉乘接駁小巴再去不同景點。
禾木景區又唔同可可托海，可可托海景區只係搭一次接駁大巴，然後就要步行。
禾木就唔同，先坐區間大巴到一個轉車站，然後再搭接駁小巴往景點。有唔同的景點站，係單循環線路，即係係邊個點落車，想去另一個點，就係番同一位置上車。
黎到呢個位，就係區間巴士轉接駁小巴的車站，參觀完景區景點後，又係番呢個站搭車返番去景區大門停車場。
禾木景區，最徝得睇，應該係禾木橋、禾木河，同埋喂鷹。
呢個景區就參觀完，會按投先講的方法去搭旅遊巴返酒店，明天會去喀納斯。
今日參觀喀納斯。喀納斯係湖區，氣溫變化好大。唔同昨天，尋日係禾木，氣溫略低巿區，著乜都無所謂。今日湖區，仲要係高海拔湖區，氣溫係變化好大。各位都可以見到人人都加衣。可以著羽絨，可以著抓毛，我就唔係好怕凍，一件風褸就夠。
依家先坐區間大巴，再轉接駁小巴。
呢個景區接巴士，都係用單循環線路，即係係邊個站落車，去另外景區，係係相同站搭車，不過呢度管理好好，落車點同上車點係有一段距離，落車遊玩完後，要係落車點行前小小上車。
喀納斯好多人，可見好受歡迎。
喀納斯係傳說中有湖怪的山中湖，所以我地先坐船遊湖。
搭船係自費項目，導遊有無賺你錢？你認為呢？
正式係人在漿糊，生不如死喇。
出黎旅行，預咗俾人賺你錢喇，遊客黎架，唔好為咗呢 D 小錢，影嚮遊玩心情。
留意吓見唔見到水怪仲好喇
船長好體貼，會去到調頭地點稍稍停留 10 分鐘，俾你影相打卡。
我地落足睇力，睇到眼水都標埋，都見唔到湖怪。
真係網名黎啫，認真便輸了。
唯有咁諗喇。到此一遊。
然後再轉接駁小巴去遊圖瓦村，行程係做探訪，
每人探訪費若干，團費包咗。
係補貼原住民收入，我覺得都可以接受。
話晒你都走咗入人地屋企範圍，俾補貼都好合理。
呢個村係有原住民表演歌舞的。
會彈唱名曲可可托海的牧羊人。
呢首歌由王琪演唱，2020 年下半年係互聯網走紅，
引發阿勒泰地區旅遊業爆紅。
因為版權關係，我唔可以播咁多。
我都係因為呢首歌詞內容，
講到可可海托、那拉提、伊犂，好靚好淒美動人，
吸引我黎新疆旅遊。
仲有搞笑互動環節，呢個探訪都幾有趣。
參觀完呢個原住民村探訪後，就會再轉接駁巴士去遊三個灣
先去神仙灣、再去月亮灣、然後臥龍灣。
如果你只遊一個灣，咁你就遊完神灣後，
直接坐巴士返去區間巴士站出遊客中心。
如果時間夠，咁你可以一個灣一個咁去打卡影相的。
我當天係唔夠時間遊咁多地方，所以淨係遊咗神仙灣，
遊神仙灣，天氣就好好，出太陽，影相好正。
遊完就可以搭返車返去搭區間車。
注意時間，由神仙灣搭車返去搭區間車站，車程係要一個鐘。
海上魔鬼城，其實所謂海，都係一個湖。
好大風，要按實戴的帽子。
按導遊講內陸地區，無見過海，所以湖就叫海
海上魔鬼城，其實係一大段風化咗的岩層
睇落好結實，其實係好鬆散
打卡影相要注意安全，無乜嘢就唔好爬出去影
今晚會幾百公里返去烏魯木齊，
因為要去火焰山、天山天池，
然後會走獨庫公路上天山山脈，
落那拉提，再去賽里木湖。
即係話會由北疆去南疆
黎到吐魯番係會先去睇坎兒井，然後再去火焰山。
現存坎兒井仲用緊約有 1700 幾個，
水係天山雪水，所以好凍好冰的
睇緊呢個係吐魯番一個驛站，交河驛，坎兒井
參觀完坎兒井後就去火焰山
參觀火焰山景區已經係下午 5 點半，
但是，太陽仲係好猛，氣溫係 46 度。
雖然係熱，但是因為大風，唔係太辛苦。
據說，全年最熱係試過70幾度，鞋都會溶的
呢個景區，放咗西遊記相關人物故事
係門口有一大把芭蕉扇，景區內有師徒四人人物像
有金剛棒溫度計等等
參觀完火焰山後，就會去天山天池
完咗天池後，第日一早會改搭 7 座越野車
要走獨庫公路翻過天山，由北疆去南疆
獨庫公路，每年只開放 4 個月，由 6 月到 9 月
呢個翻上天山山脈的公路路段
講真真係好靚，同時，俾你唔同景色之外
仲俾你係 7-8 小時的車程裏面，一次過感受 4 季
我地依家坐咗係架 7 人越野車裏面，開始爬上天山
獨庫公路，巴士係禁行
因為彎多路窄，由海拔唔夠 1000，
爬上最高係 3460
氣溫由30幾，去到最低6度
隨著唔同海拔的爬昇，爬得越高，氣溫越低
唔同海拔，你可以見到地貌不斷改變
北疆的荒涼草原，山脈，上到頂的雪山
然後落南疆的青葱草原
未到頂，會有服務區，休息站
呢段開始爬上頂，天山雪山
依家係強制停車，每差不多 3 小時，
一定要停車 20 分鐘，避免司機疲勞駕駛
獨庫公路，變化好大，
海拔變化大，溫度變化大，
由海拔唔夠 1000，爬上最高係 3460
氣溫由30幾，去到最低6度
依家係啱啱通車，如果到7月旺季，會排長龍
建議少飲水，唔係唔飲，係只小量呷一口
帶羽絨、抓毛，厚衫，仲要係可以除的較好
那拉提大草原，天氣不佳，基本上係乜都影唔到
尤其是最出名的養蜂女人像
係空中草原，但是，因為大雨關係
空中草原關閉咗，無得睇
呢度的接駁巴士，係好奇特的
每個站點，你要每一個站點落車，然後再排隊上車
假設你只想由站點 1 去站點3
唔好意思，你一定要一站一站咁排隊搭上去
最後係去賽里木湖。賽里木湖係一個冰湖，俾雪山圍住
最初係乜魚都無，後來係俄羅斯引進鮭魚，即係三文魚
然後就有魚
依家出太陽，呢個湖就變得好靚
藍天、白雲、湖水，夾埋就好靚
不過，人山人海，人好多
到 7、8 月旺季好難想象塞車塞滿人的境況
呢個湖，好大風，好凍，湖水更凍。
建議著羽絨、衛衣
風景係靚，環湖一周，40 公里時速係要 5 小時
講真，睇完喀納斯景區、天山天池景區
呢個湖真係變咗無乜觀賞價值了
介紹到黎呢度，其實已經要睇的景區都睇咗
呢個 10 天團，其實遊玩只得 8 日。
其他所謂 12 天團，咪就係得 10 日行程
基本上我地參加呢個 8 天團
實際係人地 14-15 的行程
所以如果係去新疆遊玩旅行，真心建議要最少 14 日
否則，就會好似我地咁，日日趕行程
閒閒地 300-600 公里路一天
我地係呢 8 日咁充實的行程
先後去咗
可可托河、禾木、喀納斯、海上魔鬼城
火焰山、坎兒井、天山天池、那拉提、賽里木湖
行過獨庫公路，翻過天山山脈
個人覺得跟團遊，無論係香港報團或者內地報團
都係唔及包團玩咁好
不過有得有失的
報團，價錢較平宜，好急趕
包團遊，價錢較高，時間充裕
北疆大環線旅遊介紹黎到呢度
希望以上資訊對各位正準備去或者已經報團
去新疆遊玩的朋友有幫助
謝謝收看
歡迎訂閱、點讚、留言、分享
拜拜