大家好，我哋係Primarius。
今日係Primarius正式成為聖保羅書院第六十屆學生會內閣嘅第三百六十五日，亦都係正式卸任嘅一日。
呢一年對我哋嚟講好似發咗場夢咁：中一迎新日、選舉論壇、學會聯招、中六畢業週、開放日、聖誕舞會、學生雙週、中六歡送、歌唱比賽、舊書買賣。十個活動唔算話特別多，但每個活動都係盡心盡力去籌備，以同學嘅角度去構思每一樣嘢，目的就係將最好嘅福利同埋活動帶俾每一位保羅人。
好想多謝每一位俾咗咁多意見同鼓勵我哋，包括各位老師、師兄、師弟。呢一年見到多咗同學想加入學生會，一齊投入喺學生會搞嘅活動，一齊宣傳。如果你都曾經為學生會所做嘅嘢而感到驕傲，我哋已經心滿意足。你哋令我哋知道，一個人可以走得好快，但原來只有一班人。包括你哋每一個，先可以一齊走得更遠甚至更快。
Primarius嘅七十六位，包括六位顧問老師、Mr Lee、三十三位sub-committees、二十位officials同埋十六位骨幹成員，多謝你哋每一位今年喺學生會嘅付出。可以同你哋一齊做嘢，一齊度橋，遇上你哋每一個係我哋嘅小確幸。相信離開學生會之後好難想像再有一班同你齊上齊落嘅兄弟。
燈塔會喺一艘船迷失嘅時候發光，而我哋學生會希望可以作為同學嘅依靠，喺各位需要幫忙嘅時候提供指引，因此沿用燈塔作為Primarius嘅logo。而口號 “illume in gloom, persist in fume” 提醒各位就算喺迷霧之中有幾唔如意嘅事發生都好，但只要堅持自己嘅信念，終究會見到希望嘅破曉。
或者我哋今年對學校作出嘅改變未必好多，但好榮幸可以成為各位同學中學生涯其中一個章節。我哋並唔期望你哋每一個人都支持學生會，但希望你都明白每一屆參選「聖保羅學生會」嘅同學都有佢哋自己嘅理念，所以嘢並唔係你諗得咁簡單咁容易。
最後衷心多謝大家，成就咗我哋。
有緣再見
聖保羅書院第六十屆學生會內閣 Primarius