Conferencias de Pepe Ferrer, Lluis Nel Estrada e Lucía Freitas.
Pepe Ferrer. Xornalista de longa traxectoria, desde hai unha década Ferrer é embaixador do CRDO Vinos de Jerez para a gastronomía. Desde esta perspectiva, presentou iniciativas desenvolvidas polo Consello Regulador para consolidar a imaxe de marca como destino turístico gastronómico para o marco de Jerez.
Lluis Nel Estrada. Cociñeiro e divulgador, Estrada está detrás de diversos proxectos que combinan cultura e gastronomía. Explicou algúns detalles de Gastrollar, un encontro gastronómico na Montaña Central Asturiana, e da Escuela popular de gastronomía de La Ribera.
Lucía Freitas. A cociñeira compostelá, creadora do movemento Amas da Terra e recentemente recoñecida co premio Game Changer pola prestixiosa La Liste (Francia), ofreceu unha visión da súa traxectoria como cociñeira no restaurante A Tafona, recoñecido cunha estrela Michelin e dous soles Repsol, e centrou boa parte da súa intervención en presentar a filosofía do proxecto Amas daTerra, ao que dedica boa parte da súa actividade nos últimos anos e que lle valeu o recoñecemento co I Premio Merlín, entregado dentro das xornadas AMODO.