Gunnar Helgason og Felix Bergsson eða Gunni og Felix eins og þjóðin þekkir þá, senda nú frá sér splunkunýtt lag í tilefni af ótrúlegri velgengni Íslands á íþróttasviðinu. Lagið heitir “Öll við erum eitt” og er gospelskotið stuðlag í anda þeirra félaga. Lagið er gefið út í tilefni af EM en lagið er þó ekki bundið við þann viðburð heldur er stuðningslag fyrir íslenska íþróttamenn, konur og karla, og skiptir þá ekki máli um hvaða íþrótt er rætt.
Höfundar eru Máni Svavarsson sem semur lagið og Gunni og Felix en þeir sjá um textann.
Fjölmargir komu að gerð lagsins. Máni Svavarsson sér um hljóðfæraleik auk þeirra Snorra Sigurðssonar (trompet), Sveinbjörns Grétarssonar aka Bjössa í Greifunum (gítar) og Eiðs Arnarsonar (bassa)
Gunni og Felix syngja lagið en auk þeirra syngja kanónurnar Björgvin Halldórsson og Hera Björk. Að auki syngja kórar með í viðlaginu. Annar er frá Tólfunni, stuðningsmannaliði íslenska landsliðsins í knattspyrnu og hinn er samsettur af krökkum úr Austurbæjarskóla.
Máni Svavarsson stjórnaði upptökum og útsetti lagið.