Dədə Ələsgər Ocağı İctimai Birliyi təqdim edir
Ustad Aşıq Mikayıl Azaflının 100 illik yubileyi qeyd edildi
16 dekabr 2024-cü il tarixində Rəşid Behbudov adına Mahnı Teatrında ustad aşıq Mikayıl Azaflının 100 illik yubileyi münasibətilə konsert keçirildi. Tədbir Dədə Ələsgər Ocağı İctimai Birliyinin təşkilatçılığı ilə baş tutdu.
Yubiley tədbirində giriş sözü “Dədə Ələsgər Ocağı” İctimai Birliyinin sədri, Dədə Ələsgərin nəticəsi Xətai Ələsgərli etdi. Tədbirdə Azərbaycan Respublikasının Əməkdar Elm Xadimi, Azərbaycan ədəbiyyatşünası, folklorşünas, publisist, dilçi, yazıçı və tərcüməçi, Filologiya elmləri doktoru, professor Qəzənfər Paşayev, alim, filologiya elmləri doktoru, professor, Prezident təqaüdçüsü, tanınmış şairə Mahirə Nağıqızı, tarix üzrə fəlsəfə doktoru, millət vəkili Məlahət İbrahimqızı, Azərbaycan ictimai-siyasi xadimi, jurnalist, millət vəkili Arzu Nağıyev, Azərbaycan ictimai-siyasi xadimi, millət vəkili Aydın Hüseynov çıxış edərək, Aşıq Mikayıl Azaflının zəngin irsi və aşıq sənətinə verdiyi böyük töhfələrdən söz açdılar.
Ustad aşıq Mikayıl Azaflının qızı Aşıq Gülarə Azaflı Azərbaycanın aşıq sənəti sahəsində göstərdiyi misilsiz xidmətlərinə, xalq musiqisinin qorunub saxlanılması və gələcək nəsillərə ötürülməsindəki əvəzsiz töhfələrinə görə Dədə Ələsgər Ocağı İctimai Birliyinin ən ali mükafatı "Aşıq Ələsgər 200" yubiley medalı və fəxri diplomu ilə təltif edildi. Təltifi alim, filologiya elmləri doktoru, professor Mahirə Nağıqızı təqdim etdi. Gülarə Azaflı öz növbəsində Dədə Ələsgər Ocağına diqqət və qayğıya görə təşəkkürlərini bildirdi.
Ustad aşıq Mikayıl Azaflının nəvələri Roman Azaflı, Məhsəti Azaflı, Məzahir Azaflı, nəticəsi Mikayıl Azaflı, eyni zamanda Əməkdar mədəniyyət işçiləri Ədalət Dəlidağlı, Aşıq Bəhmən Kazımov, Əməkdar mədəniyyət işçisi, Filologiya üzrə fəlsəfə doktoru, dosent Nemət Qasımlı, "İRƏVAN" xalq çalğı alətləri ansamblı, bədii rəhbər sənətşünaslıq üzrə fəlsəfə doktoru, Ü.Hacıbəyli adına Bakı Musiqi Akademiyasının professoru Maya Qafarova, Aşıq Ramin Qarayev, Aşıq Kəmalə Qubadlı, Aşıq Təbriz, Aşıq Kərəm Vəliyev, Dərya Mərdanzadə, Cavanşir Gədəbəyli, Aşıq Nəbi və Aşıq Nazim Gədəbəyli, İlqar Qələmçəli ustad aşıq Mikayıl Azaflı yaradıcılığına müraciət edərək öz ifaları ilə tamaşaçıların könüllərini oxşadılar.
Tədbirin aparıcısı isə Filologiya üzrə fəlsəfə doktoru Aytən Qurbanova idi.
Ənənəvi musiqimizin inciləri ilə yadda qalan bu gecə iştirakçılar tərəfindən böyük coşqu və sevgi ilə qarşılandı.
#MikayılAzaflı #DədəƏləsgərOcağı
#aşıq #ələsgər