يارب .. يا عالم خفى كل حبّاس
يا مروي الضّميان .. يا نور الادماس
أنـا غنـيٍ بـك .. فقيرٍ بدونـك
وانت العزيز اللي غنـيٍ عن النّاس
يا حي يا قيّوم .. يا النّافع الضّار
يا بَر يا مُغني .. يا والي يا غفّار
سبحانك اللهمّ يا عالم الغيب
أستغفرك .. والهم ثُقله كالاطعاس
ولااجْحد ولا انكر نعمتك يا كريمي
فانت الذي من رغم ذنبي رحيمي
ترحم من يتوب إلك وتْغفر ذنبه
وتفّرح اللي صار حزنه له لباس
انعمتنا بالدين .. من قبل ندعوك
وش عاد لامنّا زهمناك نرجوك !
( بالجنّة اللي من نخيلٍ و اعناب )
وانت الذي .. من نعمتك نجهل الياس
إنْلح في طلبتْك .. فالباس واللين
يوم ان غيرك ما يحب الملحّين !
لك المثل الاعلى .. يامعطي يارحمٰن
( من يعرفك فاللين .. تعرفْه فالباس )
وان ما بكينا في دعاك .. انتباكا
بين الرجا والخوف .. ندعي هلاكا
( لان الدّعاء يرد شـيٍ مقدّر )
حتى لو انه حوّل الفاس بالرّاس
في رحمتك يالله .. قمت اتفكّر
وفالتّوبة اللي بابها : ما تسكّر
ياكيف تعفو عن ذنوب و معاصي !
ورحمتك تشمل كل عاصي و بلّاس !
يا خـالقٍ ينظر لكل المخـاليق
ويعلم بما تخفي الصّدور المغاليق
ولا تاخذه سِنَةٌ ، ولا ياخذه نوم
بامرك نفسنا نلقطه دون الاحساس
نمجّدك وانت المجيد الممجّد
و ايماننا في كل يوم يتجدد
بـ كلمة التّوحيد لاشـيّ يرجح
و البر ذاري ، و البحر هاج قلّاس
شفنا الغرايب فوق سبع العجايب
( والعلم ما يُحصر ) لو انه وهايب
اليوم ندفن في بطن الارض بذره ..
و تطلع لنا بكره : بـ سدرٍ و قلقاس
تُميت بـ احياءٍ ، و تُحيي لك اموات
وتُمهل ولا تُهمل على كل مافات
لعل مـن دبّـر يعـوّد و يُقبل ..
من قبل لارباحه تساوى بالافلاس
ثم عقبها ما عاد ينفعه يا ليت
يا ليتني قدّمت ، يا ليت سوّيت
من رْجعت روحه الى مالك الملك ..
ما عاد ينفعْه النّدم و التّحماس
( يـا عـابد الله ) دام لك رب رزّاق
على العطـا من قبل تطلبه سبّاق
اطلب ، و كثّر ، وابتهج .. ثم تفائل ؛
( لان التّفاؤل قاضيٍ يُعدِم الياس )
وتحرّك بـ دينك ( ترا الدّين منجا )
واسعى لـ نشر الدين .. في كلّ الارجا
واجعلْه نصب العين .. في كل حزّة
وادع بـ ثبات الدين ( والدين هو الساس )
ووصلك صلاتك يُعتبر : وصل ربّك
و اذا وصلت الله .. يعزّك و يحبّك
( ومن حبّه الله .. حبّه الخلق كلّه )
ويعيش ما يضرب بالاخماس لاسداس
( وافعل لوجه الله ) من الخير .. و انسه
حتّى لو انه جا على غير جنسه
لا بد ما يومٍ عوضْه يتبـيّن ،
( والخير قدره ما يُقدّر بالالماس )
وفـ مقابل الرحمٰن .. لاحد يتحيّر
ولَا يحس بـ خوف .. ثم يتطيّر
( فـ الله كريمٍ يزرع البر في يوم )
ومن ظن بالله خير .. ماهوب ينداس
يَـا : مَن عن دروب المعاصي .. تخلّوا
( على النّبي المختار يالرّبع صلّوا )
وادعوا معي .. ولّا امّنوا : يالنّشاما
( يا جعل محشرْنا معَ صاحب الكاس )
#قصيدة #الشاعر #فهد بن #عبدالعزيز #السهلي في #برنامج #كاريزما على #قناة #الواقع #الفضائية