HELBESTVAN
tîreke tûj
li ser dilê helbestvanên keserkêş
daçikiya ye
helbestvan
di agirê kelkela hesreta sewdayê de
dişewitin
li baxê hezkirinê
bêhna kulîlkên rengîn
li derdoran belav dikin
helbestvan
şervanên sînornenas in
çirûskên roja hemdem in
li nav tofanên har
govenda heqîqetê digerînin
mîna teyrên baz hêlîna xwe
li asta zinarên herî bilind ava dikin
helbestvan
li nav nazikiya hest û xeyalan
ji kezebê dinalin
bi hostatiya gotinên xweşik û zêrîn
tevna helbesta xwe
dihûnin
di navbera çar dîwarên zîndanê de
tova hêviyên pêşerojê
direşînin
helbestvan
herika kaniya peyvên zelal û spehî ne
ji tasa asîmanê şîn
rondikên peşkên baranê
vedixwin
bi baskên dilê şikestî
ber bi asoya zanînê ve
difirin
li nav pêlên mij û dûmanan
hunera xwe diafirînin
helbestvan
hevalcêwiyê ramanên fîlozofan in
bi aqil û mantiq û pêhesînên xwe
perdeyên reştarî
vediçirînin
li nav hişkebeyaran xezîneyên veşartî
derdixin holê
nêçîrvanê derûniya peyvên
xweşik in
memosteyên xemla melodiya
muzikvanan e
helbestvan
şûrê destê wekheviya jiyana
azad in
dengvedana kûrahiya bîra
ramanê ne
hevparê şîn û şadiya
xwendevanên xwe ne
li dijî neheqiya zaliman
çekên rizgariyê ne
leheng û pêşengê civata xwe ne
helbestvan
li koretariya şevên bêhnteng
dibin şewqa findên geş
dibin tîreja berbangên ronak
dibin pênûsa sirên nependî
dibin keskesora gewriya xemkêşan
dibin dermanê bîranînên di jana zirav de
diperpitin
û dibin melhema
birîna êşên giyana evîndaran
Xizan Șîlan
2020-04-10
Stockholm
#xizanşilan
#HelbestênKurdî #StranênKurdî #MûzîkaKurdî #kürtçe #HunergehaWelat #MehmûdBerazî #mardin #Amed #kurdî #kürtçemüzik #kürtçe #dengbêj #videoyenkurdi #hakkari #gever
#colemêrg #wan #êlîh #mardîn #mêrdîn #şırnak #kürtçefilm #fîlmakurdî #çîrok #diyarbakır #batman #kürtçeşiir #dengbêjşakıro #mehmedarıfêcizîrî #xelilbakuzi #aramtigran #xelilxemgin #komaberxwedan #hozandino #hozanaydın