မြန်မာနိုင်ငံရဲ့ မြေအောက်သယံဇာတတွေ ရှာဖွေတူးဖော်မှုက သစ်တောပြုန်းတီးရတဲ့အကြောင်းရင်းတစ်ခု ဖြစ်ပါတယ်။ ဒီလို သယံဇာတတွေ ရှာဖွေတူးဖော်တဲ့နေရာမှာ တရားဝင်လုပ်ကိုင်တာပဲဖြစ်စေ၊ တရားမဝင် လုပ်ကိုင်တာပဲဖြစ်စေ သဘာဝပတ်ဝန်းကျင်ကို ထိခိုက်စေနိုင်ပါတယ်။ ဒီလိုထိခိုက်ခြင်းရဲ့ နောက်ဆက်တွဲအဖြစ် မိုးခေါင်တာ၊ အပူချိန်မြင့်တက်တာ၊ ရေချိုသယံဇာတဆုံးရှုံးတာ၊ ရေကြီးရေလျှံတာနဲ့ မြေပြိုတာတွေ ဖြစ်ပေါ်တတ်တယ်လို့ ပညာရှင်တွေက ပြောဆိုထားကြပါတယ်။
ကချင်ပြည်နယ် ဖားကန့်မြို့နယ်က ပြည်သူ့လွှတ်တော်ကိုယ်စားလှယ် ကိုအောင်ဟိန်းမင်းကတော့ ဖားကန့်ဒေသရဲ့ သဘာဝပတ်ဝန်းကျင် ပျက်စီးမှုတွေကို လွှတ်တော်လမ်းကြောင်းကနေ ပြုပြင်လုပ်ဆောင်သွားချင်တယ်လို့ ဆိုပါတယ်။
မန္တလေးတိုင်း မိုးကုတ်မြို့က ပြည်သူ့လွှတ်တော်ကိုယ်စားလှယ် ဦးအောင်နိုင်(ခေါ်) ဦးနိုင်ငံကျော် ကတော့ သူ့မြို့နယ်မှာ သယံဇာတကို အလွန်အကျူး တူးဖော်ခဲ့ခြင်းကြောင့် သဘာဝပတ်ဝန်းကျင်ထိခိုက်မှုတွေ ရှိခဲ့တယ်လို့ ဆိုပါတယ်။
"ပြီးခဲ့တဲ့ချိန်တုန်းက ကျွန်တော်တို့ အလွန်အကျူး တူးဖော်ခဲ့တာတွေ ရှိတာပေါ့နော်။ စည်းကမ်းတကျ မဟုတ်ဘဲနဲ့။ အဲလို အလွန်အကျူးတူးဖော်ခဲ့လို့လည်း ကျွန်တော်တို့ မြို့မှာရှိတဲ့ ချောင်းမြောင်းတွေ သဲနုန်းတွေနဲ့ ပိတ်ပြီးတော့ ရေကြီးရေလျှံမှုတွေ ဖြစ်ခဲ့တယ်ပေါ့နော်။ အဲလိုမျိုးတွေ ထပ်ပြီးမှ မဖြစ်အောင် ကျွန်တော်တို့ တူးဖော်မှုတွေကို စည်းကမ်းတကျဖြစ်အောင်၊ သဘာဝပတ်ဝန်းကျင် ထိခိုက်မှုအနည်းဆုံးပေါ့ အဲလိုမျိုးဖြစ်အောင် ဝိုင်းဝန်းထိန်းသိမ်းသွားဖို့ လုပ်ဆောင်မယ့်ကိစ္စတွေ စိတ်ကူးထားပါတယ်" ဟု သူက ဆိုထားပါတယ်။
မြန်မာနိုင်ငံရဲ့ တတိယအကြိမ် လွှတ်တော်အစည်းအဝေးကို တက်ရောက်ကြမယ့် လွှတ်တော် ကိုယ်စားလှယ်တွေထဲမှာ သဘာဝပတ်ဝန်းကျင် ထိန်းသိမ်းရေးကို စိတ်ဝင်စားကြတဲ့ လွှတ်တော် ကိုယ်စားလှယ်တွေရှိနေပါတယ်။ ၎င်းတို့ကို The Voice Weekly က ဆက်သွယ်မေးမြန်းပြီး တင်ဆက်လိုက်ပါတယ်။