Lignjada Baška 2021. - 15. Kup Sv.Mikule - Proglašenje pobjednika
Malo je takovih dani i imamo sriće da smo tu, da smo sad i da nas ima, kako bi uživali va njimi.
Škrpina Baška opet ni zakazala. Uprkos neizvjesnosti uzrokovane korona krizom i slaboj prognozi
vrimena, ovi hrabri ljudi od mora uspjeli su u ovoj teškoj situaciji uz pomoć nebrojanih, ma čak bi bilo grdo reć sponzora, nego prijatelja, organizirat jubilarnu 15. Lignjadu - Kup.Sv.Mikule Moremo samo reć da je bilo još upita za pomoć, ma već smo bili štampali plakati i ni više bilo mesta, a mala bi bila i Naša Baška da ih sve nabrojimo. Ostaje nan samo da se svimi od srca zahvalimo ca nas vole, simpatiziraju, podržavaju i rivaju naše mesto i našu tradiciju naprvo.
Svanul je i taj dan, 04.12.2021. malo uoči našeg zaštitnika Svetoga Mikule. Bura je kalala, pogodil je Vakula, ma bit će prije da su pomogli oni silni očenaši ca smo ih zmolili. Počelo je jedno, reklo bi se leno jutro a onda su se malo pomalo ljudi počeli stezat. Ekipa „Uvik isti“ dan prije prontala je sve za Lignjadu i na Paladi je zablistal novi šator od Općine okićen zi našimi zastavami i spravan za feštu uz pomoć našega dizajnera svitla. Lipo je bilo videt našu dicu ka su sudjelovala va maloj školi ribolova kako sprida ribarnice hitaju šuštavice mori jer znamo da će nas imet ki naslijedit.
Barke su pomalo počele dolazit sprida šatora kako bi bile pronte za blagoslov jer mi van najviše volimo da smo blagoslovljeni. Bome, s obzirom da zbog vele rive fali dosta barak, skupil se je lipi broj i za Lignjadu se prijavilo 39 barak zi 123 natjecatelja. Zbog najavljenog juga krajen dana nisu prišle gostujuće ekipe zi otoka, usudili su se prit jedino Puntari a čak i naši Istrijani, Frula bend ki nas zabavljaju sva ova leta, iznajmili su barku i prijavili se na natjecanje. Mi nimamo neka stroga pravila natjecanja i nima ograničenja za broj člani posade i ne plaća se kotizacija nego još svaka ekipa dobi bocu vina i piće dobrodošlice. Stavili smo na prijavljivanju kutiju kamo se moglo donirat šoldi za EKG za našu ambulantu i tamo se je do kraja veceri skupilo 2420 kn.
Srića da je bilo manje barak nego inače jer smo kad je na uru označen start jedva zišli van zi porta, kako je sada uže zbog radova na rivi. Ekipe su se raspršile od Zecja do Bracola. Uskoro su već počele dolazit vijesti o prvim ulovima a zi nekih barak već je počela i pjesma. Najedanput se je čul uzvik veselja da su sve ovce na Prviću pa i ona dva čaglja na Rebici naćulili uši. To je Loren Babić stegnul veloga lignja od osandeset deki a poslije se pokazalo da je to i najveći liganj ćapan na Lignjadi. Vrime na moru i va dobromu društvu brzo pasa pa je i prišlo doba da se nakon celoga dana zabave,sporta i rekreacije vratimo va porat. Počelo je dizat jugo, taman nas je vrime pustilo da finimo morski dio Lignjade. Dočekali su nas i okrijepili naši vridni kuhari i konobari i dok su se ljudi zabavljali uz Frula bend meštri od Lignjade zvagali su ulov.
Pokazalo se je da su favoriti opravdali očekivanja. Prvo mesto osvojila je ekipa 121 BŠ Loren Babić, Dario Babić, Matija Gluhak. Ćapali su 4,785 kili. Druga je ekipa BŠ 682 Borut Mohar, Darko Mohar, Franc Kotnik i Željko Dorić zi 2,625 kili a treći ipak malo iznenađenje, ekipa BŠ 725 Andrej Valčić, Dražen Baris, Josip Hrgovčić, Dario Hrabrić i Tomislav Đordić ki su ćapali 2,265 kili liganj. Ukupno se je ćapalo 35 kili liganj. Najmlađi ki je sudjeloval nan je bil Kristian Kamber 2013.godište a najstariji Tihomir Seršić 1933. godište.
Poslije proglašenja pobjednika i dodjela nagrada tu krasnu bašćansku noć obasjale su rakete vatrometa. Zabava je nastavljena ali nažalost zbog korona mjera samo do pol noći.
Zato jedva čekamo drugo leto i 16.u Lignjadu na koj ćemo dočekat i zoru uz našu parolu, "ja doma ne gren“. Držmo se do onda svi skupa va slogi, ljubavi, zdravlju i veselju.
Hvala svimi i svako dobro va Novomu letu!
Škrpina Baška